Iha loron 30 Novembru 2010, Peace Dividend Trust (PDT) serwisu hamutuk ho Camara do Comercio Bobonaro no Governu Distrital Bobonaro hodi hala’o soru mutu ba dahuluk ne’ebe halibur sosa nain sira husi Atambua (Indonesia) no fa’an nain sira husi distritu Bobonaro no Oecussi. Objetivu ba sorumutu ne’e mak atu habelar informasaun kona ba produktu sira nebe mak iha distritu Bobonaro no Oecussi ba sosa nain husi Atambua, no mos atu hakbi’it relasaun diak entre fa’an nain husi distritu Bobonaro no Oecussi no sosa Nain sira husi Atambua kona ba merkaduria.
Ema ne’ebe partisipa iha sorumutu ne’e hamutuk nain 67 ne’ebe kompostu husi fa’an nain sira husi distritu rua hamutuk 27 no mos sosa nain sira husi Atambua hamutuk 21 no mos atende husi Sr. Joao Martins administrador distritu Bononaro, Sr. Norberto Jose, presidente CCI Bobonaro, Anibal C Martins, representante husi MTCI, no mos CCI-TL Nacional Alberto Carvalho. Husi kabupaten Belu/Atambua, Nusa Tenggara Timur (NTT), Indonesia mak hanesan: Sr. Petrus Bere, MM, Sekretaris Wilayah Daerah (SEKWILDA), Sr. Salomanon Tonang, Kamar Dagang (KADIN) Atambua, Sr. Dekson R H, kepala Bea Cukai no mos Sra. Dra. Isabel M. de Barros, kepala bidang perdagangan ho autoridade seguransa husi nasaun rua ne’e. Iha oportunidade ne’e, Sr. Administrador Bobonaro, CCI Bobonaro, no mos Sr. SEKWILDA Belu no KADIN Belu hato’o sira nia laran ksolok tebes ba PDT, tamba bele realisa sorumutu ne’ebe hein kleur ona, Sr. SEKWILDA ho KADIN Belu husu PDT atu kontinue supporta aktividade ida, atu nune’e empresa husi Atambua, Bobonaro no Oecussi bele hasoru malu bei-beik hodi koalia kona ba negosio no merkado ba produktu sira nebe rai rua ne’e iha. Antes atu hakotu sorumutu ne’e, SEKWILDA Belu dehan tenik “ Kami sangat berterima kasih kepada LSM PDT yang mana telah menfasilitasi pertemuan yang selama ini ditunggu-tunggu dan diharapkan agar tetap membentu di masa depan”.
Liu husi sorumutu ne’e, fa’an nain sira husi distritu rua : Sr. Mateus Godinho hato’o ou apresenta rekursu agrikula hanesan: kami’i, nu maran, forekeli, fore munggu, koto, aifarina, sukaer, maek, hare, karau, kinur, ai manas-ai leten, ai lia, fehuk, karau kulit, ect. Hafoin ne,e fo mos tempu ba sosa nain sira husi Atambua hodi hato’o saida deit mak sira hakarak atu sosa. Sr. Willy Lay no Julius Minure husi Toko Gajah Mada dehan katak “ami sosa sasan hirak ne’ebe ohin temi iha leten ne’e bei-beik ona, maibe depois PDT hahu serwisu iha distritu Bobonaro ami hetan fa’an nain barak liu tan no aumenta ninia kuantidade, tamba ne’e, ami kontente tebes ho serwisu PDT nia ne’e” dehan Willy Lay. Iha fatin ne’e mos, Willy Lay dehan ami hakarak mos atu sosa sasan mak hanesan: maek, sukaer, aimanas ai leten/fuik, ai lia no karau kulit. Se karik sei iha mos husi distritu seluk bele mos fo hatene ami liu husi CCI Bobonaro ou PDT nia staff sira.
Ikus mai, Sr. Willy hodi naran maluk sosa nain sira husi Atambua, husu atu PDT kontinua fasilita programa mak hanesan ne’e iha oin mai. Sr. Mateus Godinho, fa’an nain/empresa husi distrito Bobonaro dehan “ ami kontenti tebes ho PDT nia serwisu ne’e, tamba lori ami hodi hasoru malu kedas ho ema sosa nain husi Atambua, uluk ami fa’an sasan, liu husi “tengkulak”, agora ne’e diak tamba ami hatene kedas ema nebe sosa sasan husi toko Gajah Mada no seluk tan, ida ne’e diak tebes”. Husu ba PDT atu bele tulun ami nafatin iha oin mai.
Tags : bobonaro fronteira
More from this author -
Latest News -
Malaysia Hakarak Investe Iha Timor-Leste
Chamber of Commerce Investment Malaysia
